Güləş

Millimizin Avropa çempionatı üçün heyəti

Makedoniyanın Skopje şəhərində yeniyetmə güləşçilər arasında Avropa çempionatı start götürüb. Dsport.az xəbər verir ki, yarışda hər 3 güləş növü üzrə yığma komandamızın üzvləri iştirak edəcək. 

Çempionatın proqramına əsasən, 14-16 mayda sərbəst, 16-18 mayda isə yeniyetmə qızlar mübarizə aparacaq. Yunan-Roma güləşçiləri isə mayın 18-20-də xalça üzərinə çıxacaq. 

Yarışın son günlərində mübarizəyə qoşulacaq yunan-Roma güləşi üzrə yığmamızın heyətində 10 güləşi yer alıb. Böyük məşqçi Bəhram Mürvətov, məşqçilər Fuad Əliyev və İslam Cəfərovun rəhbərliyi altında çempionatda ölkəmizi Qurban Qurbanov (45 kq), Nihad Quluzadə (48 kq), Həsrət Cəfərov (51 kq), Murad Abbasov (55 kq), Xanəhməd Zeynalov (60 kq), Ruslan Hədisov (65 kq), Allahverdi Əliyev (71 kq), Eldar Məmmədov (80 kq), Laçın Vəliyev (92 kq) və Sərxan Məmmədov (110 kq) təmsil edəcək.  

Məlumat üçün bildirək ki, Avropa çempionatı 12-14 oktyabrda Argentinanın Buenos Ayres şəhərində keçiriləcək yeniyetmələrin III Olimpiya Oyunlarına lisenziya xarakteri daşıyır. Belə ki, yunan-Roma güləşi üzrə 45, 51, 60, 71 və 92 kq, sərbəst güləş üzrə 48, 55, 65, 80 və 110 kq, qadın güləşi üzrə 43, 49, 57, 65 və 73 kq çəkidə çempion olacaq güləşçilər Olimpiya Oyunlarına birbaşa vəsiqə qazanacaq. Reqlamentə əsasən isə, qazanılmış lisenziyaların sayından asılı olmayaraq, hər bir ölkə hər bir güləş növü üzrə maksimum 2 idmançı ilə təmsil oluna bilər.