Bizim futbol

“Uypeşt”in 2 futbolçusu Bakıya buraxılmadı

“Neftçi” ilə keçirəcəyi Avropa Liqasının 1-ci təsnifat mərhələsinin ilk oyunu ilə əlaqədar Bakıya gələn Macarıstanın “Uypeşt” klubunun 2 futbolçusu problemlə üzləşib. 

Dsport.az xəbər verir ki, komandanın malili yarımmüdafiəçisi Diallo Alassan və nigeriyalı hücumçusu Obinna Emmanuel Nvobodoya Bakı Hava Limanında viza verilməyib. Bu barədə Budapeşt təmsilçisinin rəsmi saytı məlumat yayıb.

Hər iki oyunçu bu gün səhər saatlarında adi reyslə Macarıstana göndəriləcəklər. Beləliklə, baş məşqçi Neboyşa Vinyeviçin sərəncamında cəmi 17 futbolçu qalıb. 

Bundan başqa "Uypeşt"i çarter reysi ilə gətirən 36 nəfərlik təyyarə yolda benzin doldurmaq üçün iki dəfə - Türkiyənin Bursa və Trabzon hava limanlarına eniş edib. Bu səbəbdən, Budapeştdən yerli vaxtla saat 9:30-da yola çıxan heyət Heydər Əliyev hava limanına saat 18:40-da çatıb. "Uypeşt" aeroport yaxınlığındakı "Şeraton Baku" otelində məskunlaşıb. 

Bakıya gec çatdıqlarından, budapeştlilər "Dalğa Arena"da məşqə çıxa bilməyiblər və baş məşqçinin mətbuat konfransı ləğv olunub. 

Bütün çətinliklərə və yorğunluğa rəğmən, "Uypeşt"in futbolçusu Daniel Nad bugünkü qarşılaşmada daha yaxşı çıxış etməyə çalışacaqlarını bildirib. O, Bakı barədə ilkin təəssüratlarının müsbət olduğunu da vurğulayıb: "Yol çox yorucu oldu, xeyli yol sərf etdik və yorulduq. Bununla belə, bütün çətinliklərin öhdəsindən gəlməliyik. Ən yaxşı formanı yığmaq üçün mümkün olan hər şeyi edəcəyik. İlkin təəssüratlarımız yaxşıdı. Bizi təmiz və gözəl ətraf mühit qarşıladı. Otel əladı. Elə bir yerdəyik ki, şərait bizə dincəlməyə və böyük günə hazırlaşmağa imkan verir". 

Qeyd edək ki, bu gün "Dalğa Arena"da keçiriləcək "Neftçi" - "Uypeşt" matçı Bakı vaxtı ilə saat 21:00-da başlanacaq (Report).